Texte

Alle hier aufzufindenden Texte sind urheberrechtlich geschützt.

Ahne


Fuessschpuure
Tüüf im Buuch
Trampelpfad
Schteinig ruuch

Unbekannti Lieder
Trummelschläg im Traum
Römische Fanfare
Verrieglete Raum

Vo böse Bilder gfässlet
Bindet mich bitte los
Kämpfe gäge d Schtrömig
Uf me chline Floss
                                                                       

Ahne wohned i mir
Alt aber ächt
Ur-Ur-Ur-Grossväter
Poched uf ihres Rächt

Läbe vor em Läbe
S gliichi Bluet
Längscht velöschti Flamme
Zächi Gluet

Urväter Urmüetter
Vewandti Geischter
Gnoome
Dringed dur d Feischter

Es Schiff e Fregatte
Mit tuusig Fahne
Kaleidoskop vo rote
Blaue grüne Ahne

Ohne sie hät ich kais Gsicht
Ohne si wäre mis Läbe kai Gedicht

Zwei i mir


Ein fühlt sich wohl am Tag
Ein fühlt sich wohl i de Nacht
Ein treit nur was er mag
Ein schleppt dass es kracht

Ein fühlt sich wohl i de Beize
Umarmt die ganzi Wält
Ein tuet das gar nümme reize
Ihn reut das vieli Gäld

Ein fühlt sich wohl i de Klarheit
Ein fühlt sich wohl im Suff
Ein suecht sini Wahrheit
De Ander leit Deckene druff

Es sind zwei i mir
Ich vezwiifle schier
Zwei sind i mir dihei
Bi einfach nie allei

Ein fühlt sich wohl im Schwümmbad
Ein fühlt sich wohl im Sumpf
Ein muuved wie es Zahnrad
Ein dreht sich leer und dumpf

Ein wo am Morge uufschtaht
Chunnt guet us em Bett
Ein wo z Abig uusgaht
Nächte lang redt und redt

Schtell das Lied ab


Leeri Schtrasse
Volli Beize
Wii us Truube
Bier us Weize
Alles wichtig
Alles gliich
Schtell das Lied ab
S mahnt mich a dich

Müedi Gsichter
Wachi Geischter
Dunkli Nacht und
Helli Feischter
Wänn ich ändlich
Hai zue schliich
Schtell das Lied ab    
S mahnt mich a dich

Liechte Schlaf und
Schweri Zunge
Schtich im Härz und
I de Lunge
Hoffe dass die            
Nacht verschtriich
Schtell das Lied ab
S mahnt mich a dich

Schwarze Kaffi
Graue Morge
Fremdi Lüüt und
Eigni Sorge
Wer sind ihr
Und wer bin ich
Schtell das Lied ab               
S mahnt mich a dich


Bi so truurig


Es rägnet und rägnet
Is nassi Gras,
Min Huuch schlaat e Wulche
As Fäischterglas.

Es tropfed und tropfed
I d Peterli.

Bi so truurig wili truurig bi.

Es lached und lached
Am Näbetisch,
I mir in gits gar nüüt
Wo luschtig isch.

Es träned und träned
Mis Zwäierli.

Bi so truurig wili truurig bi.

Es rusched und rusched
Am Farbfernseh.
Mis Herz isch us Beton
Und doch tuets weh.

Es chlopfed und chlopfed
Am Läbe verbii.

Bi so truurig wili truurig bi.

Gang doch


Gang doch wänn du willsch
Du gahsch eh wänn du willsch
Sind ja nur mini Träum wo du killsch

Träum vo Gültigkeit und vo Ganz
Vo Liebesgebät und Eleganz
Träum vo Hühnerhuut und vo Glanz
Vo Strandhotelbett und Tämpeltanz

Gang doch gang doch
Mir isch es gliich
S interessiered sich
Gnueg für mich

MANIE


De Lüchtturm blinkt
Schturmalarm
I mim Chopf
En Bieneschwarm

D Auge flackret
D Schtimm wie Bläch
De Buuch zittred
Alles zäch

D Vögel kreisched
De Asphalt schwümmt
D Schtadt schtinkt
Min Schädel rünnt

Manie Manie Manie
Beherrscht mis Sii
Manie Manie Manie
Sie isch gross ich bi chli

Ich heb ab
Flüüg devo
Gfühl sind Kerosin
D Nerve glasig fiin

S Hirni explodiert
D Balance us em Lot
D Rueh hät Ausziit
Wahn schtüürt mis Boot


Muet


Schtunde um Schtunde
Im Schilf gschtande
Alles Vertraue abhande
E ändlosi Sekunde
I de Angscht gfange
Ame Fade ghange

Runde um Runde
Im Kreis gange
Alli Signallicht vehange
E ändlosi Sekunde
Voll bangem Plange
Ich muss mich wieder fange

((Bridge))
Min Muet isch mal chlii mal gross
Mängisch isch er morsches Floss
Mängisch isch er prachtvolli Yacht  
Mängisch isch er e riesigi Seemacht

Min Muet isch de Matador i mir
D Angscht isch en schnaubende Schtier
Min Muet isch en Hochseilakrobat                          
D Angscht isch e schtarchs Opiat
 
Schtunde um Schtunde
Im Schilf gschtande
Alles Vertraue vorhande
E lachhafti Sekunde
Überschtande
D Angscht cha nöd lande

Runde um Runde
Im Kreis gange
Alli Signallicht veschtande 
E lachhafti Sekunde
Überschtande
Ha mich wieder gfange

Min Muet isch de Matador i mir
D Angscht nur en schnaubende Schtier
Min Muet isch en Hochseilakrobat                          
D Angscht isch e schwachs Opiat

Ohni dich


Läbe ohni Rascht und Rueh
Ohni Luft zum Schnuufe
Läbe inre Wüeschti
Heiss und ruuch

Schwümme i de schwere Schueh
Und glich nie vesuuffe
Tuusig Tonne zäche
Liim im Buuch

Zäche Liim im Buuch
Wüeschti heiss und ruuch
D Hoffnig ohni Schtimm
Alles nöd so schlimm

Alles kain Verglich
Zum Ufschtah ohni dich
Alles so belanglos
Alles kain Verglich
Ufschtah ohni dich
Alles isch so grau und gliich
Ohni dich

Abschied ohni Abschiedsgruess
Ohni es Beduurre
Abschied ohni Lächle
Ohni Schtiil

Uufschtah uf em falsche Fuess
Uf Befehl vo Uhre 
Uufschtah ohni Hoffnig
Ohni Ziel

Abschied ohni Gruess
Uf em falsche Fuess
D Hoffnig ohni Schtimm
Alles nöd so schlimm

S ungnaui Heihweh


Ich han es ungnaus Heiweh
Flüssig wie es Gas
Weiss numme dass es da isch
Weiss nöd emal nach was

Ha Heiweh nach furt
Ich ha Heiweh nach Ziit
Ha Heiweh nach nöd da
Ich ha Heiweh nach wiit

S schwümmt eifach i mir umme
Schlüpfrig wie en Fisch
Und wänn ich s wetti packe
Weiss ich nöd wo s isch

Ha Heiweh nach nää
Ich ha Heiweh nach haa
Ha Heiweh nach bhalte
Ich ha Heiweh nach daa

S schtiigt eifach i mir uffe
Und s taucht i mich ii
Und fascht sit ich cha dänke
Isch s i mir inne gsii

Ha Heiweh nach läär
Ich ha Heiweh nach grau
Ha Heiweh nach nümme
Ich ha Heiweh nach Tschau

S huust i mim Inneläbe
Als wäri s det dihei
Wenigschtens fühlt sich s Heiweh
I mir inne dihei

Ha Heiweh nach rein
Ich ha Heiweh nach klar
Ha Heiweh nach suuber
Ich ha Heiweh nach wahr


Under Zwang


Schlafe schlafe schlafe
Häsch kei anderi Wahl
Schlafe schlafe schlafe
Wach sii isch nur Qual

Zäh butze schpüele butze schpüehle
S Muul schmöckt nach Tod
Schpüehle butze schpüehle
S Zahfleisch isch bluetrot

Aazieh umzieh aazieh umzieh
Zehle zehle zehle
Aazieh umzieh Aazieh umzieh
Automatisch ohni z welle

Tür uuf Tür zue Tür uuf
Nüt uff de Wält funktioniert
Tür uuf Tür zu Tür uuf
D Dämone sind raffiniert

Under de Vorschtadtzug
Nur en chline Schritt
Under de Vorschadtzug
De Zug nimmt dich mit

Tee choche nomal choche nomal
Bakterie sind e Gfahr
Abchoche abtöte choche töte
Tag für Tag Jahr für Jahr

Händ wäsche Händ wäsche
Es muess alles wäg
Händ wäsche Händ wäsche
Ekel vor em Dräck

((Bridge))
Caroline oh Caroline
Din Zwang isch jetzt verbii
Caroline oh Caroline
S zehle macht dich nümme hii
Caroline oh Caroline
Du bisch jetzt es Tröpfli im Rhy

Under de Vorschtadtzug
Nur en chline Schritt
Under de Vorschadtzug
Machsch nümme mit

Vollmond und Föhn


E riesegrosses Adrio
Sehnig fett und bleich
Isch ob de Dächer füre cho
Und schpiegled sich im Teich

Im Weschte isch s orangerot
Chläbrig süess und satt
En warme rosarote Wind
Zieht Fäde über d Schadt

Nähmed eu in acht
S wird e schlimmi Nacht
Voll Gjammer und Gschtöhn
S isch Vollmond und s isch Föhn

Vollmond und Föhn
Grossi Schprüch und
Chlini Löhn

Und wieder bin ich uf dr Gass
Chribblig luut und wach
Dr Mond wird dünn und blass
Dr Grund wieso ich s mach

Und wieder bliib ich bis am Schluss
Mit em harte Chärn
Und wieder gib ich einere en Kuss
Und ha sie gar nöd gärn

Chumm no mit mir hai
Lo mi nid allei
Hüt z Nacht sind alli schön
S isch Vollmond und Föhn

Vollmond und Föhn
Grossi Schprüch
Und chlini Löhn
Vollmond und Föhn
Hüt s Nacht
Sii alli schön

Wunderbar


Am Morge
Wänn sie i de Underwösch
Kaffi schlürft
Mit wild veschtrubblete Haar
Find ich sie wunderbar

Schpäter
Wänn sie us em Bad chunnt
In me schöne Rock
Mit glatt frisierte Haar
Find ich sie wunderbar

Am Abig
Wänn sie s Büro
Mit me Bier wägschpüehlt
Mit ganz verrägnete Haar
Find ich sie wunderbar


Mir mir. Mit dir. Mit öis
Sit Jahr und immer wieder Neus
Verankeret. Bunde. Und trotzdem frei
Zäme. Und trotzdem ellai            

Mini Auge blitzed wänn ich sie gseh
Mini Ohre pfiffed es Lied
Mini Lippe suched ihr
iOhne sie gäbs mich so nüme meh

I de Beiz
Wänn sie de Wii bschtellt
Und vezehlt und vezehlt
Und wussled i ihrne Haar
Find ich sie wunderbar

Im Bett dänn
Wänn sie schnäll iischlaft
Und sich umdräht
Fahr ich ihre dur d Haar
Und find sie wunderbar


René Fisch


René Fisch

Feierabendstrasse 53
4051 Basel

 

Tel.: +41(0) 078 654 09 56

 

 

rene.fisch@gmx.ch

TUDOR RECORDING AG


TUDOR RECORDING AG

Badenerstrasse 75
CH-8004 Zürich

 

Tel.: +41(0) 44 405 26 46

Fax: +41(0) 44 405 26 40

 

info@tudor.ch